By | December 22, 2017

መውረድ ወይስ መዋረድ?

By Demilew Almaw

Dictator's Final Days

The End of Dictators’ by Cuban Artist Edel Rodriguez (b. 1971). Via the Artist’s site

በኢትዮጵያ ታሪክ ውስጥ የሕዝብን ጥያቄ ተቀብሎ በክብር ከሥልጣን የወረደ ንጉሥም ሆነ መንግስት አልታየም:: አለመታየቱንም ለማስረዳት ወደ ሁዋላ ሂዶ ያለፉትን ነገሥታትንና መንግስታትን አወራረድ ማውሳት አያስፈልግም:: ምክንያቱም ሁሉም እስከመጨረሻዋ ዕድል ድረስ ቆይተው ፍጻሜአቸውን ማበላሸታቸው ለኢትዮጵያ ሕዝብ አዲስ ታሪክ ስላልሆነ::

ዛሬ ወያኔ በሕዝብ ስልጣን ላይ ሆኖ በስብሻለሁ:: በክቻለሁ እያለ እንደገና እራሱ አገግሞ እስኪመጣ ድረስ የኢትዮጵያ ሕዝብ ከነብስባሴው እንዲሸከመው ይፈልጋል:: የበሰበሰ ነገር ደግሞ ይከረፋል:: ይገማል:: ይጠነባል:: እንኩዋን ሊሸከሙት ሊጠጉት እንኩዋን የማይቻል ነው:: ሽታው እራሱ በሽታ ነው:: ይህን ያልተረዳ ወያኔ ከነ ምናምኑ ከኢትዮጵያ ሕዝብ ጀርባ አልወርድ ብሎ እየታገለ ነው:: ያለፉትን ሥርዓቶች አወራረድ አይቶ የራሱን አወራረድ እንዲያሳምር እየተመከረ ነው:: እየተለመነም ጭምር:: የወያኔ ጆሮ ግን መስማት የሚፈልገውን ብቻ መስማት ስለሚፈልግ ሕዝብን ለማዳመጥ እየተቸገረው ይገኛል:: እንዲያውም በሽታውን ኖርማል ለማድረግ እና ከሕዝቡ እንዲጋባም ጭምር የሚያደርገው ጥረት የባሰ አዘቅት ውስጥ እየሰመጠ ነው::

ወያኔ እጅግ በጣም የከፋ እና የከረፋ ታሪክ ባለቤት ነው:: የሰው ልጅ ነፍስን በጅምላ የጨፈጨፈ ሥርዓት ነው:: ነፍስ ግድያ ቀላል ወንጀል አይደለም:: ከሥልጣን ከወረድኩ ሕግ አይለቀኝም:: ስለዚህ ሥልጣንን እንደ የመጨረሻ ዋስትና አድርጌ መቆየት አለብኝ:: የሚፈታተነኝ ካለ በኃይል ተረግጦ ይገዛል:: ብሎ ዘርፈ- ብዙ ወንጀል መሥራት የእራስን መቃብር በገዛ እራስ እንደመቆፈርና እራስን በእራስ እንደመቅበር ጭምር ነው::ወንጀልን ያስብሳል እንጂ አይቀንስም :: ዛሬ የኢትዮጵያ ሕዝብ በዘር ተዘርዝሮ ሲነታረክ ለወያኔ ዕድሜ አይሰጥም:: የኢትዮጵያ ሕዝብ በጎሣ እየተጎሠሠ ለወያኔ የሥልጣን ዘመን አያራዝምም:: የኢትዮጵያ ሕዝብ ወያኔ የአባሎቹን የደጋፊዎቹን እና የተባባሪዎቹን ፎቅ እያሳየ ለምተናል ሲባል አምኖ አይቀበልም:: የኢትዮጵያ ሕዝብ የወያኔን የመሠረተ ድንጋይ ንጣፍ እያየ የህልም ተስፋ በመመገብ ሌላ የግፍ አገዛዝ ዘመን አይፈቅድም::

በአጠቃላይ የወያኔ የማጨናበሪያ እና የማደናገሪያ መሣሪያዎች በሙሉ ተበላሽተዋል:: እንደከዚህ ቀደም አገልግሎት አይሰጡም:: እንደዚሁም ወያኔ ሕግ አስከባሪና ኃላፊነት የሚሰማው ድርጅት አድርጎ ለማስመሰል በአባላቶቹ ውስጥ ጠጥረውብኛል ብሎ የሚያያቸው አባሎቹን ጭዳ በማድረግ እራሱን የሚያተርፍበት ስልትም ጭንጋፍ ከሆነ ቆየ :: አይሠራም:: ወያኔ በሁሉም ነገር ሲያቅተው በጉልበት የለየለት አምባገነን ሆኖ ለመቀጠል ከመመኘቱ የተነሳ ሠራዊቱን በመላው የኢትዮጵያ ክልል እያሰፈረ ነው::

መስሎት ነው እንጂ እራሱ ሠራዊቱ አፈሙዙን ወደ እራሱ እንደሚያዞር የጠረጠረው አይመስልም ::

ስለዚህ ወያኔ ልብ ከገዛ ከሥልጣን ለመውረድ እራሱን ዝግጁ ማድረግ አለበት:: ከሥልጣን አወራረድን ማጥናት ይኖርበታል:: ይህን ካላወቀበት መዋረድን አሜን ብሎ መቀበል ግድ ይለዋል :: የማይቀረው አጋጣሚ ይኸው ነው::

ደምለው

Leave a Reply

Your email address will not be published. Required fields are marked *